«Чемпионнарның Чүректери» фондузу ээлчеглиг машинаны СВО зоназынче чоруткан
«Чемпионнарның Чүректери» деп ачы-буян фондузу тускай шериг операциязының киржикчилеринге УАЗ «Патриот» автомобильди дамчыткан. Фонд фронтуже чаңгыс удаа эвес машина чорудуп турар - ооң мурнунда дайынчыларга чаа «Ниваны» база берген.
Фондунуң үндезилекчизи Меңги Чудактың демдеглээни-биле мурнуку одуругже үндүрген чүүл бүрүзү чүгле материалдыг деткимче эвес, а чаңгыс демниң демдээ-дир:
«Дамчыткан машина бүрүзү, төрээн черинден келген дамчыдылга бүрүзү — хамыктың мурнунда, оларның эрес-дидим чоруунга бистиң чоргааралывыс болгаш бүзүреливистиң демдээ» - деп, ол онзалап демдеглээн.
2022 чылдан тура дайынчыларга дуза фондунуң ажылының кол угланыышкыны апарган. Россияның Маадыры Чалым Чүлдүм-оолга техниканы чедиреринге болгаш күжениишкиннерни дүүштүреринге дузалашканы дээш онза өөрүп четтиргенин илереткеннер.
