Кызылда Совет Эвилелиниң Маадырларынга тураскааткан стендилерни ачы-буян фондузу тургускан

Ада-Чурттуң Улуг дайынынга Тиилелгениң 80 чыл оюн демдеглеп, «Чемпионнарның чүректери» ачы-буян фондузу совет Эвилелиниң Маадырларынга тураскааткан кудумчу стендилерин тургузар патриотчу төлевилелди боттандырып турар.

Баштайгы стендиде тыва эки турачы, танкист, Совет Эвилелиниң Маадыры Хомушку Намгаевич Чүргүй-оолдуң эрес-дидим чоруунуң дугайында бижээн. Информастыг стенд маадырның ады-биде адаан кудумчудаа тургустунган. Хомушку Намгаевич 1943 чылдан тура Ада-Чурттуң Улуг фронтуларынга шылгараңгай эрес-дидим чоруун көргүзүп демисежип турган.

База бир стенд Восток микрорайонунда көстүп келген. Ол Николай Иванович Кузнецов дугайында чугаалап турар — хайгыылчы, партизан, Ровно хоорайның хостакчызы, база-ла Маадыр атка төлептиг болган.

Стендилер хоорай инфраструктуразының анаа-ла каасталгазы эвес, а төөгүнү кадагалаарының чугула чепсээ деп Фондуда демдеглеп турар. «Маадырларның аттары чүгле номнарже эвес, а хоорайларывыстың, кудумчуларывыстың, бажыңнарывыстың хүн бүрүде амыдыралынче киир бижиттинерин күзеп турар бис. Өзүп орар салгал өгбелерин утпас ужурлуг» - деп, организацияда демдеглээн.

Аныяктарның патриотчу кижизидилгези Фонд ажылының угланыышкыннарының бирээзи-дир. «Чемпионнарның чүректери» Россияның Маадырлары-биле кады ажылдап турар, тускай шериг операциязының киржикчилеринге дузаны чедирип турар, концерттер болгаш спортчу маргылдааларны эрттирип турар, хамааты тускайлаң байдалды быжыглаарынче угланган эгелээшкиннерни база деткип турар.

Стендилер тургузар төлевилел ам-даа уламчылаар. Мурнувуста — чаа аттар, чаа адрестер болгаш ниити Тиилелгениң чаа арыннары.