Самбисттерге материалдыг деткимчени көргүскен

Новосибирскиге 16-18 харлыг оолдар болгаш кыстар аразынга самбога Россияның бирги чери дээш маргылдаага тыва спортчуларның киржилгезин "Чемпионнарның Чүректери" фонду акшаландырган.

Акша-хөреңгини бүгү-российжи деңнелге Тыва Республиканы төлээлээн аныяк мөгелерниң аян-чоруун белеткеп үдээринче база оларның күүселдезинге таарымчалыг байдалдарны тургузарынче угландырган.

"Спорт дээрге кижиниң хей-аъды бедик, тиилелгеже чүткүлү болгаш хүн бүрүде күш-ажылы-дыр. Чурттуң улуг маргылдааларынга республиканы төлептии-биле төлээлээр салым-чаяанныг аныяк спортчулар Тывада өзүп турары чоргааранчыг-дыр" - деп Фондуда демдеглээн.

Иван Ярыгин аттыг Гран-при серияның Хостуг хүреш делегей маргылдаазынга бодун көргүскен дөрт спортчуга премияны ооң мурнунда Фонд 700 муң рубль түңнүг тускайлап бергенин сагындыраал.