Ада-чурт камгалакчыларын деткээн буянныг концерт долу залды чыгган

Ада-чурт камгалакчызының хүнүнге тураскаадып "Чемпионнарның Чүректер"и фондунуң организастап эрттиргени "Маадырга мөгейиг" деп баштайгы ачы-буян концерди Кызылга болуп эрткен. Чурттуң мурнунга хүлээлгезин алдар-биле күүседип турар бүгү кижилерге өөрүп четтиргенин илередири - эрткен хемчегниң сорулгазы болган.

Сценага тыва эстраданың артистери - Улустуң хөөмейжилери, Тыва Республиканың алдарлыг артистери болгаш аныяк күүседикчилер - аян тутканнар. Оларның аразында Игорь Көшкендей, Андрей Монгуш, Айдаш Барыңмаа, Айдың Монгуш (Ишкин Оглу), Сайзана Сюрюн, Айдың8, "Хөөн" студияның ыражыылары болгаш өске-даа хөгжүмчүлер киришкен.

Көрүкчүлер залынга аншлаг турган. Аалчыларның аразында Россияның Маадырлары Мерген Донгак биле Чалым Чүлдүм-оол, шериг албанныглар, дайынчы хөделиишкиннерниң хоочуннары база СВО-нуң киржикчилериниң өг-бүлелери болгаш чоок кижилери бар.

"Концерттиң кол сорулгазы бистиң маадырларывыска оларның эрес-дидим чоруу дээш четтиргенивисти илередири, дайынчы эштерин сактып, ада-иелерге болгаш чоок улузунга бичии када-даа болза сагыш-сеткили-биле дыштанып алыр арганы бээри. Ол кежээ чаңгыс демниң хүндүткелдиң болгаш деткимчениң демдээ апарган" - деп Фондунуң үндезилекчизи Меңги Чудак демдеглээн.

"Чемпионнарның Чүректери" фондузу бүгү артисттерге, көрүкчүлерге болгаш партнерларынга хемчегни эрттиреринге киржилгези болгаш дузазы дээш өөрүп четтиргенин илереткен.